സർക്കാരിന്റെ ക്രിസ്മസ് സമ്മാനമായി എൽപിജി വില കുറയ്ക്കൽ

മുൻകൂട്ടിയുള്ള പ്രഖ്യാപനം നേട്ടമാകുമെന്നും, ഫലം കാണുമെന്നും വിലയിരുത്തൽ

സർക്കാരിന്റെ ക്രിസ്മസ് സമ്മാനമായി എൽപിജി വില കുറയ്ക്കൽ. വാണിജ്യ ആവശ്യങ്ങൾക്ക് ഉപയോഗിക്കുന്ന 19 കിലോഗ്രാം എൽപിജി സിലിണ്ടറിന്റെ വിലയിലാണ് ഇടപെടൽ. അസാധാരണ ഇടപെടലിലൂടെ 19 കിലോഗ്രാം വാണിജ്യ എൽപിജി സിലിണ്ടറിന് 39.50 രൂപയാണ് കുറച്ചത്. സാധാരണഗതിയിൽ മാസാദ്യമാണ് എണ്ണക്കമ്പനികൾ എൽപിജി വില പരിഷ്‌കരിക്കാറുള്ളത്. വാണിജ്യ സിലിണ്ടറുകളുടെ വില കുറച്ചത് ഹോട്ടലുകൾ, റെസ്‌റ്റോറന്റുകൾ, കമ്മ്യൂണിറ്റി കിച്ചണുകൾ പോലുള്ള സംരംഭങ്ങൾക്ക് നേട്ടമാകും.

ഈ മാസം ആദ്യം വാണിജ്യ സിലിണ്ടറുകളുടെ വില 21 രൂപ വർധിപ്പിച്ചിരുന്നു. മൂന്നു മാസം കൊണ്ട് വാണിജ്യ സിലിണ്ടർ വിലയിൽ 331.5 രൂപയുടെ വർധനയുണ്ടായിരുന്നു. അതേസമയം ആഗോള വിപണിയിൽ ക്രൂഡ് വില കുത്തനെ കുറഞ്ഞതിനിടെ മാസാദ്യം വില വർധിപ്പിച്ചത് വലിയ ചർച്ചയായിരുന്നു. പുതിയ വില പരിഷ്‌കരണത്തോടെ 19 കിലോഗ്രാം വാണിജ്യ സിലിണ്ടറിന് ഡൽഹിയിൽ 1,757.50 രൂപയും, കൊൽക്കത്തയിൽ 1,869 രൂപയും, മുംബൈയിൽ 1,710 രൂപയും, ചെന്നൈയിൽ 1,929.50 രൂപയുമാണ് വില.

ക്രിസ്മസ്- പുതുവത്സര ആഘോഷങ്ങൾ കണക്കിലെടുത്താണ് ഇത്തവണ നേരത്തേ എൽപിജി വില പരിഷ്‌കരിച്ചത്. സർക്കാർ ഇടപെടലും വിഷയത്തിൽ ഉണ്ടായി. അതേസമയം ഗാർഹിക ആവശ്യങ്ങൾക്ക് ഉപയോഗിക്കുന്ന 14.2 കിലോഗ്രാം എൽപിജി സിലിണ്ടർ വിലയിൽ മാറ്റമില്ല. പെട്രോൾ, ഡീസൽ വിലയും മാറ്റമില്ലാതെ തുടരുകയാണ്.

ആഗോള വിപണിയിൽ ക്രൂഡ് വില വീണ്ടും 80 ഡോളറിലേയ്ക്ക് അടുത്ത സാഹചര്യത്തിൽ ഇന്ധനവിലയിലെ ഇളവുകൾക്കുള്ള സാധ്യത വീണ്ടും കുറയുകയാണ്. 2024 ജനുവരി മുതൽ ഒപെക് പ്ലസിന്റെ പുതിയ റൗണ്ട് ഉൽപ്പാദന നിയന്ത്രണം കൂടി പ്രാബല്യത്തിൽ വരുന്നതോടെ ആഗോള ക്രൂഡ് വില വീണ്ടും വർധിക്കാം. ചങ്കടലിൽ ഹൂതി വിമതരുടെ ആക്രമണം ആഗോള ക്രൂഡ് ചരക്ക നീക്കത്തെയും ബാധിക്കുന്നുണ്ട്. ഇതു വില വർധിക്കാനുള്ള കാരണമാണ്.

അതേസമയം രാജ്യത്തെ പണപ്പെരുപ്പം പിടിച്ചു കെട്ടാനാണ് സർക്കാർ നീക്കം. ആഘോഷവേളയ്ക്കു മുന്നേ വാണിജ്യ എൽപിജി വില കുറച്ചതു വഴി പണപ്പെരുപ്പത്തെ വരുതിയിലാക്കാൻ കഴിയുമെന്നാണു വിലയിരുത്തൽ. വാണിജ്യ സിലിണ്ടറുകളുടെ വില കുറച്ചത് സർക്കാരിന്റെ കമ്മ്യൂണിറ്റി കിച്ചണുകൾ പോലുള്ള ജനസേവന പദ്ധതികൾക്കും വലിയ ആശ്വാസമാകും.

എല്ലാ മാസവും ഒന്നാം തീയതിയാണ് എണ്ണക്കമ്പനികൾ എൽപിജി വില പരിഷ്‌കരിക്കുന്നത്. ഇറക്കുമതി പാരിറ്റി വില ഫോർമുല ഉപയോഗിച്ചാണ് കമ്പനികൾ പാചക വാതക വില നിർണയിക്കുന്നത്. ഇന്ത്യയിൽ പാചക വാതകം കൂടുതലും ഇറക്കുമതിയെ ആശ്രയിച്ചിരിക്കുന്നു. അതിനാൽ തന്നെ അന്താരാഷ്ട്ര വാതക വില പ്രാദേശിക എൽപിജി വിലയെ സ്വാധീനിക്കുന്നു. കൂടതെ ഡോളർ- രൂപ വിനിമയ നിരക്കും ഇവിടെ വളരെ പ്രധാനമാണ്.