ടെലികോം വരിക്കാരുടെ എണ്ണത്തില് വന് വര്ധന
ന്യൂഡൽഹി: ജനുവരി മാസത്തില് ഇന്ത്യയിലെ ടെലികോം വരിക്കാരുടെ എണ്ണത്തില് വര്ധന രേഖപ്പെടുത്തി. ജനുവരിയില് മാത്രം 7.86 ദശലക്ഷം പുതിയ വരിക്കാരാണ് ഈ മേഖലയിലേക്ക് എത്തിയതെന്ന് ടെലികോം റെഗുലേറ്ററി അഥോറിറ്റി ഓഫ് ഇന്ത്യ (ട്രായ്) പുറത്തുവിട്ട ഏറ്റവും പുതിയ കണക്കുകള് വ്യക്തമാക്കുന്നു. ഇതോടെ രാജ്യത്തെ ആകെ ടെലിഫോണ് വരിക്കാരുടെ എണ്ണം 1.314 ബില്യണായി ഉയര്ന്നു.
മൊബൈല് കണക്ഷനുകളില് വലിയ കുതിപ്പുണ്ടായെങ്കിലും ബ്രോഡ്ബാന്ഡ് മേഖലയില് വളര്ച്ച വളരെ മന്ദഗതിയിലാണെന്ന് കണക്കുകള് സൂചിപ്പിക്കുന്നു. വെറും 0.20 ശതമാനം മാത്രമാണ് ബ്രോഡ്ബാന്ഡ് വരിക്കാരുടെ വര്ധന. വിപണിയിലെ കടുത്ത മത്സരം വ്യക്തമാക്കിക്കൊണ്ട് മൊബൈല് നമ്പര് പോര്ട്ടബിലിറ്റിക്കായുള്ള അപേക്ഷകളിലും വര്ധനയുണ്ടായിട്ടുണ്ട്. ഏകദേശം 15.98 ദശലക്ഷം പേരാണ് തങ്ങളുടെ സേവനദാതാക്കളെ മാറ്റുന്നതിനായി ജനുവരിയില് മാത്രം അപേക്ഷ നല്കിയത്.
