ഏറ്റവും തിരക്കേറിയ പത്ത് വിമാനത്താവളങ്ങളിൽ ഒന്ന് ഇന്ത്യയിൽ; രണ്ടാം സ്ഥാനത്ത് മലയാളികളുടെ പ്രിയപ്പെട്ട വിമാനത്താവളം
എയർപോർട്ട് കൗൺസിൽ ഇന്റർനാഷണൽ പ്രസിദ്ധീകരിച്ച ലോകത്തിലെ ഏറ്റവും തിരക്കേറിയ പത്ത് വിമാനത്താവളങ്ങളുടെ പട്ടികയിൽ ഇന്ത്യയിൽ നിന്നുള്ള ഒരു വിമാനത്താവളം ഇടം നേടിയിരിക്കുന്നു. രാജ്യതലസ്ഥാനത്തുള്ള ഇന്ദിരാഗാന്ധി രാജ്യാന്തര വിമാനത്താവളം ഒൻപതാം സ്ഥാനത്ത് എത്തിയിരിക്കുന്നു.
മുൻ വർഷങ്ങളിൽ ഡൽഹി വിമാനത്താവളത്തിന്റെ സ്ഥാനം 2019ൽ 17 ആയിരുന്നു, 2023ൽ പത്താം സ്ഥാനത്തെത്തിയിരുന്നു. യുഎസിലെ അറ്റ്‌ലാന്റ വിമാനത്താവളം ഒന്നാം സ്ഥാനം നിലനിർത്തുന്നു. മൊത്തം 20 മുൻനിര സ്ഥാനങ്ങളിൽ ആറെണ്ണം അമേരിക്കൻ വിമാനത്താവളങ്ങളാണ് കൈവശപ്പെടുത്തിയിരിക്കുന്നത്.
കഴിഞ്ഞ വർഷം ഡൽഹി അന്താരാഷ്ട്ര വിമാനത്താവളത്തിലൂടെ 7.7 കോടിയിലധികം യാത്രക്കാർ സഞ്ചരിച്ചതായി റിപ്പോർട്ടിൽ വെളിപ്പെടുത്തുന്നു. കഴിഞ്ഞ വർഷങ്ങളെ അപേക്ഷിച്ച് ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ യാത്രക്കാരുടെ എണ്ണത്തിൽ 2.7 ശതമാനം ഉയർച്ചയുണ്ടായതായി റിപ്പോർട്ടിൽ രേഖപ്പെടുത്തിയിരിക്കുന്നു.
പട്ടികയിൽ രണ്ടാം സ്ഥാനം കൈവശപ്പെടുത്തിയിരിക്കുന്നത് പ്രവാസി മലയാളികളുടെ പ്രധാന ഗതാഗത കേന്ദ്രമായ ദുബായ് രാജ്യാന്തര വിമാനത്താവളമാണ്. ഏഷ്യയിൽ നിന്നുള്ള നാല് വിമാനത്താവളങ്ങൾ ആദ്യ പത്തിൽ ഇടംപിടിച്ചു. ദുബായിന് പിന്നാലെ നാലാം സ്ഥാനത്ത് ടോക്കിയോ വിമാനത്താവളവും, ന്യൂഡൽഹിക്ക് പിന്നിൽ ഷാംഗ്ഹായ് വിമാനത്താവളവും ഇടംപിടിച്ചു.
മുൻനിര 20 വിമാനത്താവളങ്ങളിൽ മൊത്തം 1.54 ബില്യൺ യാത്രക്കാർ എത്തിച്ചേർന്നതായും ആഗോള വിമാന ട്രാഫിക്കിന്റെ 16 ശതമാനം ഇവയിലൂടെ നടന്നതായും റിപ്പോർട്ടിൽ സൂചിപ്പിക്കുന്നു. 185-ൽ അധികം രാജ്യങ്ങളിലെ 2800-ൽ അധികം വിമാനത്താവളങ്ങളിൽ നിന്നുള്ള ഡാറ്റ ശേഖരിച്ചാണ് ഈ പട്ടിക തയ്യാറാക്കിയതെന്ന് എയർപോർട്ട് കൗൺസിൽ ഇന്റർനാഷണലിന്റെ ഔദ്യോഗിക വെബ്സൈറ്റ് വ്യക്തമാക്കിയിട്ടുണ്ട്.
