Indian toy sector; ചൈനീസ് ഇറക്കുമതിക്ക് യുഎസ് ഏർപ്പെടുത്തിയ തീരുവ നേട്ടമാക്കാൻ ഇന്ത്യയിലെ കളിപ്പാട്ട വ്യവസായം
Indian Toy Sector; ചൈനീസ് ഇറക്കുമതിക്ക് യുഎസ് ഏർപ്പെടുത്തിയ ഉയർന്ന തീരുവകളിൽ നിന്ന് ഉണ്ടായ സാഹചര്യം സുവർണാവസരം പ്രയോജനപ്പെടുത്താൻ ഇന്ത്യയിലെ കളിപ്പാട്ട കയറ്റുമതിക്കാർ. കൂടാതെ ചൈനീസ് ഉത്പന്നങ്ങളെ ആശ്രയിക്കുന്നത് കുറക്കാൻ ബദൽ വിപണികൾ തേടുകയാണ് യുഎസിലെ വ്യാപാരികൾ. യുഎസ് വിപണിയിലേക്ക് കയറ്റുമതി ചെയ്യാൻ സാധ്യതയുള്ള ഏകദേശം 40 സ്ഥാപനങ്ങളെ ടോയ് അസോസിയേഷൻ ഓഫ് ഇന്ത്യ ഇതിനകം കണ്ടെത്തുകയും ചെയ്തു. നിലവിൽ 20 ഓളം കമ്പനികൾ അമേരിക്കൻ വിപണിയിലേക്ക് കളിപ്പാട്ടങ്ങൾ മൊത്തമായി കയറ്റുമതി ചെയ്യുന്നുണ്ടെന്ന് പ്രസിഡന്റ് അജയ് അഗർവാൾ പിടിഐയോട് പറഞ്ഞു. ‘കഴിഞ്ഞ ഒരു മാസത്തിനിടെ യുഎസ് ആസ്ഥാനമായുള്ള കളിപ്പാട്ടം വാങ്ങുന്നവരിൽ നിന്ന് കൂടുതൽ അന്വേഷണങ്ങൾ ലഭിക്കുന്നുണ്ട്. യുഎസ് നിയമങ്ങളും ചട്ടങ്ങളും അനുസരിച്ച് കളിപ്പാട്ട ഉത്പന്നങ്ങൾ നിർമ്മിക്കാൻ കഴിയുന്ന നിർമ്മാതാക്കളുടെ പട്ടിക തേടി ചില ഇന്ത്യൻ കയറ്റുമതി സ്ഥാപനങ്ങളും ഞങ്ങളെ ബന്ധപ്പെട്ടിട്ടുണ്ട്. യുഎസ് കളിപ്പാട്ട വിപണിയുടെ ആവശ്യകതകൾ നിറവേറ്റാൻ കഴിവുള്ള വൈറ്റ് ലേബലിംഗ്, ഒറിജിനൽ ഉപകരണ നിർമ്മാതാക്കളെ അവർ അന്വേഷിക്കുന്നു,’ അഗർവാൾ പറഞ്ഞു. ജിഎംഐ റിസർച്ചിന്റെ കണക്കനുസരിച്ച്, യുണൈറ്റഡ് സ്റ്റേറ്റ്‌സിന്റെ കളിപ്പാട്ട വിപണി വലുപ്പം 2024 ൽ 42.8 ബില്യൺ യുഎസ് ഡോളറിലെത്തി. 2032 ൽ ഇത് 56.9 ബില്യൺ യുഎസ് ഡോളറിലെത്തുമെന്ന് കണക്കാക്കപ്പെടുന്നു. ‘കളിപ്പാട്ടങ്ങൾക്ക് യുഎസ് വലിയൊരു വിപണിയാണ്. ചൈനയ്ക്ക് ഉയർന്ന താരിഫ് ഏർപ്പെടുത്തുകയും ഇന്ത്യയ്ക്ക് കുറഞ്ഞ താരിഫ് ഏർപ്പെടുത്തുകയും ചെയ്താൽ നമുക്ക് പ്രയോജനം ലഭിക്കും.’ മറ്റ് രാജ്യങ്ങളെ അപേക്ഷിച്ച് നിരക്കുകൾ കുറവാണെന്നതിന്റെ അടിസ്ഥാനത്തിൽ താരിഫിന്റെ ആനുകൂല്യം നമുക്ക് ലഭിക്കുകയാണെങ്കിൽ, യുഎസ് വിപണിയിൽ ഇന്ത്യൻ കളിപ്പാട്ടങ്ങളുടെ സാന്നിധ്യം വർദ്ധിപ്പിക്കാൻ നമുക്ക് കഴിയുമെന്ന് ടോയ് അസോസിയേഷൻ ഓഫ് ഇന്ത്യ പ്രസിഡന്റ് പറഞ്ഞു.
