ഇന്ത്യൻ സമ്പദ്വ്യവസ്ഥ ഈ ദശകത്തിൽ 7 ട്രില്യൺ ഡോളറിലെത്തും; 2030-കളുടെ മധ്യത്തോടെ ഇരട്ടിയാകും
ന്യൂഡൽഹി: ഇന്ത്യൻ സമ്പദ്വ്യവസ്ഥ വൻ കുതിച്ചുചാട്ടത്തിന് ഒരുങ്ങുകയാണെന്നും ഈ ദശകത്തിൽ 2030 അവസാനത്തോടെ രാജ്യം 7 ട്രില്യൺ ഡോളർ (7 ലക്ഷം കോടി ഡോളർ) മൂല്യമുള്ള സമ്പദ്വ്യവസ്ഥയായി മാറുമെന്നും റിപ്പോർട്ട്. നിലവിൽ ഏകദേശം 4.3 ട്രില്യൺ ഡോളർ വലുപ്പമുള്ള ഇന്ത്യൻ സമ്പദ്വ്യവസ്ഥ വരും വർഷങ്ങളിൽ വലിയ തോതിൽ വികസിക്കുമെന്നാണ് വിലയിരുത്തൽ. അമേരിക്കയിൽ നടന്ന ‘IX USISPF ലീഡർഷിപ്പ് സമ്മിറ്റ് 2026’ൽ പങ്കെടുത്ത യു.എസിലെ ഇന്ത്യൻ അംബാസഡർ വിനയ് മോഹൻ ക്വാത്രയാണ് രാജ്യത്തിന്റെ ദീർഘകാല സാമ്പത്തിക വളർച്ചാ പദ്ധതികളെക്കുറിച്ചുള്ള ഈ വിവരങ്ങൾ പങ്കുവെച്ചത്.
ഈ ദശകത്തിന്റെ അവസാനത്തോടെ 2030 ഇന്ത്യൻ സമ്പദ്വ്യവസ്ഥ 7 ട്രില്യൺ ഡോളറിലെത്തുകയും 2030-കളുടെ മധ്യത്തോടെ ഇത് രണ്ടിരട്ടിയായി വർദ്ധിച്ച് 14 ട്രില്യൺ ഡോളറായി മാറുകയും ചെയ്യും. 2047-ഓടെ രാജ്യം 25 മുതൽ 30 ട്രില്യൺ ഡോളർ വരെയുള്ള വൻ സാമ്പത്തിക ലക്ഷ്യത്തിലേക്ക് കുതിക്കും. ആഗോളതലത്തിൽ നേരിടുന്ന വിവിധ വെല്ലുവിളികൾക്കും പ്രതിസന്ധികൾക്കും ഇടയിലും, പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള ഇന്ത്യ ആഗോള സാമ്പത്തിക ക്രമത്തിന്റെയും വളർച്ചയുടെയും ഒഴിച്ചുകൂടാനാവാത്ത ഒരു പ്രധാന കേന്ദ്രമായി മാറുകയാണെന്ന് ക്വാത്ര വ്യക്തമാക്കി.
ഇന്ത്യയും അമേരിക്കയും തമ്മിലുള്ള നിർണായകമായ ഇടക്കാല വ്യാപാര കരാർ ഉടൻ തന്നെ യാഥാർത്ഥ്യമാകുമെന്ന് ഇന്ത്യയിലെ യു.എസ് അംബാസഡറായ സെർജിയോ ഗോർ സൂചന നൽകി. ആയിരക്കണക്കിന് ഉൽപ്പന്നങ്ങൾ ഉൾപ്പെടുന്ന സങ്കീർണ്ണമായ നിയമപരമായ പ്രക്രിയകളിലൂടെയാണ് ഈ ചർച്ചകൾ പുരോഗമിക്കുന്നത്.
പ്രസിഡന്റ് ഡൊണാൾഡ് ട്രംപിന് ഈ കരാറിൽ വലിയ താല്പര്യമുണ്ടെന്നും, വരാനിരിക്കുന്ന ഡിസംബറിലെ ജി20 ഉച്ചകോടിക്കായി പ്രധാനമന്ത്രി നരേന്ദ്ര മോദി അമേരിക്ക സന്ദർശിക്കുമെന്നും അദ്ദേഹം കൂട്ടിച്ചേർത്തു. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമാക്കുന്നതിന്റെ ഭാഗമായി അടുത്ത വർഷം യു.എസ് പ്രസിഡന്റ് ഡൊണാൾഡ് ട്രംപ് ഇന്ത്യ സന്ദർശിച്ചേക്കുമെന്നും സെർജിയോ ഗോർ സൂചിപ്പിച്ചു.
