14-ാം വയസ്സിൽ ബുർജ് ഖലീഫയിൽ ഓഫീസ്; ദുബായിലെ ഏറ്റവും പ്രായം കുറഞ്ഞ AI സ്റ്റാർട്ടപ്പ് സ്ഥാപകനായി ഇന്ത്യൻ വംശജൻ ജെയ്നം ജെയിൻ
ദുബായ്: സാധാരണയായി 14 വയസ്സുള്ള കുട്ടികൾ സ്കൂൾ പരീക്ഷകളെക്കുറിച്ചും ഹോംവർക്കുകളെക്കുറിച്ചും ചിന്തിച്ചിരിക്കുമ്പോൾ, ഇന്ത്യൻ വംശജനായ ജെയ്നം ജെയിൻ എന്ന കൗമാരക്കാരൻ ചിന്തിക്കുന്നത് ആർട്ടിഫിഷ്യൽ ഇന്റലിജൻസിന്റെ ഭാവിയെക്കുറിച്ചാണ്. ലോകത്തിലെ ഏറ്റവും ഉയരം കൂടിയ കെട്ടിടമായ ദുബായിലെ ബുർജ് ഖലീഫയുടെ 141-ാം നിലയിൽ ഇന്ന് ജെയ്നത്തിന് സ്വന്തമായി ഒരു ഓഫീസുണ്ട്. ദുബായിലെ ഔദ്യോഗിക കണക്കുകൾ പ്രകാരം യു.എ.ഇയിലെ ഏറ്റവും പ്രായം കുറഞ്ഞ AI സ്റ്റാർട്ടപ്പ് സ്ഥാപകനാണ് ഈ മിടുക്കൻ.
‘മെംഗോ എഞ്ചിൻ’ (Mengo Engine) എന്ന വിപ്ലവം
ജെയ്നം ജെയിൻ കെട്ടിപ്പടുത്തിരിക്കുന്ന AI സ്റ്റാർട്ടപ്പിന്റെ പേര് ‘മെംഗോ എഞ്ചിൻ’ (Mengo Engine) എന്നാണ്. ബിസിനസ്സുകൾക്കും വ്യക്തികൾക്കും AI സാങ്കേതികവിദ്യ കൂടുതൽ എളുപ്പത്തിൽ ഉപയോഗിക്കാൻ പ്രാപ്തമാക്കുന്ന ഒരു അത്യാധുനിക പ്ലാറ്റ്ഫോമാണിത്. മുതിർന്ന ടെക് വിദഗ്ധർ പോലും പതറുന്ന AI രംഗത്താണ് കേവലം 14 വയസ്സുകാരനായ ഈ കുട്ടി സ്വന്തം സാമ്രാജ്യം കെട്ടിപ്പടുത്തിരിക്കുന്നത്.
6-ാം വയസ്സിൽ തുടങ്ങിയ ബിസിനസ്സ് പാഠങ്ങൾ
ജെയ്നത്തിന്റെ ഈ അസാധാരണ വിജയത്തിന് പിന്നിൽ വർഷങ്ങളുടെ കഠിനാധ്വാനമുണ്ട്. തന്റെ ആറാം വയസ്സിലാണ് സംരംഭകത്വത്തെക്കുറിച്ചുള്ള (Entrepreneurship) ആദ്യ പാഠം ജെയ്നം പഠിക്കുന്നത്. അന്ന് അച്ഛൻ ജെയ്നത്തെ കൂടെക്കൂട്ടി ഒരു ബിസിനസ്സ് മീറ്റിംഗിന് കൊണ്ടുപോയി. മുതിർന്നവർ ബിസിനസ്സ് കാര്യങ്ങൾ ചർച്ച ചെയ്യുന്നത് കണ്ട് കൗതുകം തോന്നിയ ജെയ്നത്തിന് അന്നുമുതൽ ആ ലോകത്തോട് താല്പര്യമായി. ക്ലാസ് മുറിയിലെ പുസ്തകപ്പുഴുവാകാൻ ജെയ്നം തയ്യാറായിരുന്നില്ല. വലിയ ബിസിനസ്സ് പരിപാടികളിൽ പങ്കെടുത്തും, പ്രമുഖ വ്യക്തികളെ നേരിട്ട് കണ്ടും, സംരംഭങ്ങൾ എങ്ങനെ പ്രവർത്തിക്കുന്നു എന്ന് തത്സമയം കണ്ടറിഞ്ഞുമാണ് ഈ കൗമാരക്കാരൻ വളർന്നത്. നെറ്റ്വർക്കിംഗും പ്രായോഗിക അറിവുമാണ് തന്നെ ഈ നിലയിൽ എത്തിച്ചതെന്ന് ജെയ്നം വിശ്വസിക്കുന്നു.
സ്റ്റാർട്ടപ്പിനും അപ്പുറമുള്ള അത്ഭുത നേട്ടങ്ങൾ
കേവലം ഒരു കമ്പനി സ്ഥാപിച്ചു എന്നതിൽ ഒതുങ്ങുന്നതല്ല ജെയ്നത്തിന്റെ പ്രൊഫൈൽ. ഒരു ശരാശരി മുതിർന്ന വ്യക്തിക്ക് ജീവിതകാലം മുഴുവൻ കൊണ്ട് നേടാൻ കഴിയാത്ത കാര്യങ്ങളാണ് ഈ 14-ാം വയസ്സിൽ ജെയ്നം സ്വന്തമാക്കിയിരിക്കുന്നത്. ലോകപ്രശസ്തമായ TEDx വേദികളിൽ പ്രഭാഷണം നടത്തി ലോകമെമ്പാടുമുള്ള ലക്ഷക്കണക്കിന് യുവാക്കൾക്ക് ജെയ്നം പ്രചോദനമായിക്കഴിഞ്ഞു. സാങ്കേതികവിദ്യയിൽ തന്റേതായ രണ്ട് കണ്ടുപിടിത്തങ്ങൾക്ക് ഈ ചെറുപ്രായത്തിൽ തന്നെ ജെയ്നത്തിന് പേറ്റന്റ് ലഭിച്ചിട്ടുണ്ട്. ബിസിനസ്സിനെയും സാങ്കേതികവിദ്യയെയും കുറിച്ച് പ്രതിപാദിക്കുന്ന ഒരു പുസ്തകവും ജെയ്നം ഇതിനോടകം എഴുതി പ്രസിദ്ധീകരിച്ചു. തന്റെ അറിവുകൾ മറ്റുള്ളവരിലേക്ക് പങ്കുവെക്കാനുള്ള യൂട്യൂബ് ചാനലിന് നിലവിൽ 1,45,000-ത്തിലധികം സബ്സ്ക്രൈബേഴ്സ് ഉണ്ട്. ബിസിനസ്സ്, ടെക്നോളജി, മോട്ടിവേഷൻ എന്നിവയാണ് പ്രധാന ഉള്ളടക്കം.
